Advertisement

Advertisement

Shop

Shop

Mixer

Mixer

Monday, 12 October 2015

UMEME KWA SASA NI TATIZO NCHINI HAYA NDIO MANENO YA RAIS KIKWETE KWENDA KWA TANESCO


Rais Jakaya Kikwete ametaka Shirika la Umeme Tanzania (Tanesco), kutafuta njia za dharura kukabili hali ya umeme nchini, ambayo ni mbaya.

Alitaka Tanesco iongeze kasi kufanya majadiliano na kampuni iliyojitokeza kuleta umeme, lakini kwa kuhakikisha wanafuata sheria na taratibu, isije yakatokea ya miaka ya nyuma, yaliyosababisha kidonda mpaka leo. Alisema hayo juzi, alipozindua rasmi miundombinu ya kuchakata na kusafirisha gesi asilia kutoka Mtwara na Lindi hadi jijini Dar es Salaam.

Kikwete alisema hali ya umeme nchini ni mbaya kutokana na ukame uliojitokeza, kama wa mwaka 2006. Hata hivyo, alisema ingawa hali hiyo inaonesha kuzunguka kila baada ya miaka 10, ni bahati ulifanyika uamuzi mapema wa ujenzi wa bomba la gesi, vinginevyo hali ingekuwa mbaya zaidi.

Alisema juzi Tanesco waliingiza megawati 70 za umeme kutoka mtambo wa Kinyerezi na baada ya wiki moja, wataingiza megawati 80 kwa kutumia gesi asilia. Lakini, alisema megawati zilizopotea kwa umeme wa maji ni nyingi kuliko zinazoingia, hivyo tatizo kuendelea kuwapo.

“Nimewaagiza Tanesco kuwa hali hiyo sasa siyo ya kawaida, lazima kufanya uamuzi ambao siyo wa kawaida kwa kutafuta ufumbuzi, lakini wazingatie sheria na taratibu ili kupata mbadala na isilete tatizo kama awali,” alisema. Rais Kikwete alimtaka Mkurugenzi Mtendaji wa Tanesco, kuhakikisha umeme unapatikana ili kuondolea shaka wananchi.

“Ongezeni kasi ya mazungumzo na wanaotaka kutupatia umeme kwa kufikisha megawati 970 huku mahitaji yakiwa 940 pamoja na kuwa na umeme wa dharura, ili nchi isiingie kwenye matatizo ya mgao,”alisisitiza.

Alisema gharama ya ujenzi wa miundombinu hiyo ni kubwa, lakini ilimlazimu kukopa kutokana na umuhimu wake katika kukabiliana na tatizo la umeme nchini.

Akizungumzia ukame katika mabwawa ya kuzalisha umeme, Kikwete alisema Kidatu yenye uwezo wa kuzalisha megawati 240, hivi sasa inazalisha megawati 27.

Mabwawa mengine ni Kihansi ambayo inatakiwa izalishe megawati 180, lakini zinazalishwa megawati 45, na Pangani megawati 68 na sasa zinazalishwa 25. Kwa upande wa bwala la Mtera, uzalishaji umefungwa baada ya kina cha maji kufika 687 na hivyo mtambo kuingiza tope.

Akizungumzia ushauri wa Rais Kikwete, Mkurugenzi Mtendaji wa Tanesco, Felchesmi Mramba alisema wameanza mazungumzo ya awali na kampuni ya kuzalisha umeme kwa wingi na haraka na muda si mrefu watatoa taarifa walipofikia.

Akizungumzia huduma za jamii kwa vijiji vinavyopitiwa na miundombinu na uchimbaji gesi, Rais Kikwete alilitaka Shirika la Maendeleo ya Petroli Tanzania (TPDC) kuwachimbia visima wanavijiji, waache wanaolalamika gesi kuchukuliwa wakati wao wakibaki na shida ya maji.

“Msipofanya hivyo mtakuwa na mgogoro usioisha,” alisema. Alisisitiza, “Huu ni wajibu kwa jamii inayowazunguka haina mjadala, tafuteni ufumbuzi ili muishi vizuri; pia wasaidieni katika zahanati na shule kwani hali ni mbaya.”

Chanzo: Habari Leo

No comments:

Post a Comment