Advertisement

Advertisement

Shop

Shop

Mixer

Mixer

Wednesday, 2 December 2015

UJENZI WA BARABARA YA MWENGE -MOROCCO KWA KUTUMIA FEDHA ZA SHEREHE ZA UHURU UMEANZA


Tingatinga la Kampuni ya Ujenzi ya Estim ya jijini Dar es Salaam likisafisha Barabara ya Bagamoyo kutoka Mwenge-Morocco jana, kwa ajili ya upanuzi wake kama ilivyoagizwa na Rais John Magufuli juzi. (Picha na Mroki Mroki).
Ikiwa ni siku moja  tu mara baada ya Rais John Magufuli kuamuru fedha zilizotengwa kwa ajili ya sherehe za Uhuru zikajenge barabara ya Bagamoyo kipande cha kilometa 4.3 cha Mwenge – Morocco, jijini Dar es Salaam, ujenzi huo umeanza jana.

Kwa mujibu wa Gazeti la Habari Leo lililoshuhudia tingatinga mbili mali ya kampuni ya ukandarasi ya Estim katika eneo la Mwenge, yakisafisha eneo la barabara hiyo, ikiwa ni maandalizi ya upanuzi, kama maagizo ya Rais yalivyosema.

Dk Magufuli juzi aliamuru fedha zilizopaswa kutumika kugharamia sherehe za Sikukuu ya Uhuru ambazo zingefanyika Desemba 9, mwaka huu, kutumika kufanya upanuzi wa barabara hiyo ya Mwenge hadi Morocco kwa kuongeza njia mbili za barabara za lami.

Aidha, tayari fedha hizo Sh bilioni nne zimepelekwa kwa Wakala wa Barabara (TANROADS) kwa ajili ya utekelezaji wa agizo hilo, ambalo limeanza kutekelezwa mara moja kupitia mkandarasi huyo, Estim wa jijini Dar es Salaam.

Dk Magufuli alimuagiza Mtendaji Mkuu wa Tanroads, Patrick Mfugale walipokutana Ikulu Dar es Salaam juzi, kuwa ujenzi wa barabara hiyo uanze haraka ili kukabiliana na adha ya msongamano wa magari katika barabara hiyo.

Mmoja wa wasimamizi wa ujenzi huo kutoka kampuni ya Estim ambaye hakutaka kutaja jina lake, alipohojiwa na gazeti hili kuhusu kuanza kwa ujenzi huo na utachukua muda gani, alisema taarifa zote zipo Tanroads.

Hata hivyo, jitihada za kumpata Mfugale hazikuzaa matunda baada ya kutafutwa mara kadhaa kwa simu na kuambiwa kuwa yupo kikaoni na wasaidizi wake walisema yeye ndiye mwenye taarifa kamili.

Chanzo: Habari Leo

No comments:

Post a Comment