Mhandisi Nditiye atoa kibarua kwa TMA

Naibu Waziri wa Uchukuzi na Mawasiliano Mhandisi Atashasta Nditiye (wa kwanza kushoto) akipatiwa taarifa ya hali ya hewa kwa usafiri wa anga na Meneja wa Utabiri wa Hali ya Hewa, Samwel Mbuya wa Mamlaka ya Hali ya Hewa Tanzania wakati alipotembelea makao makuu ya mamlaka hiyo jijini Dar es Salaam.

Suleiman Kasei

NAIBU Waziri wa Uchukuzi na Mawasiliano, Mhandisi Atashasta Nditiye ameitaka Mamlaka ya Hali ya Hewa Tanzania (TMA), kujitangaza umuhimu wake katika nyanja ya kiuchumi na kijamii kwa wananchi na taifa kwa ujumla.

Mhandisi Nditiye ametoa agizo hilo alipotembelea makao makuu ya TMA ambapo alizungumza na bodi ya mamlaka hiyo, menejimenti na wafanyakazi kwa lengo la kutambua majukumu yao na kufuatilia utekelezaji wake ili kufikia malengo ya serikali ya kuwatumikia wananchi.

Akizungumza na Bodi, menejimenti na wafanyakazi, Mhandisi Nditiye amewaeleza kuwa TMA ni chombo muhimu kwa maendeleo ya kiuchumi na kijamii ya taifa na wananchi kwa ujumla kwa kuwa sekta ya usafiri wa anga, majini, ujenzi wa majengo mbalimbali, miundombinu ya barabara na reli, afya, kilimo na mazingira vyote vinategemea taarifa za hali ya hewa kutoka kwenye mamlaka hiyo.

“Mtambue kuwa hakuna ndege inayoweza kutua wala kuruka bila kupata taarifa kutoka kwenu, vile vile mkandarasi anayejenga reli ya kisasa ya SGR naye anategemea taarifa zenu kwa kiasi kikubwa, hivyo mtambue ninyi ni muhimu na mjitangaze,” amesema Mhandisi Nditiye.

Mwenyekiti wa Bodi ya TMA, Dk. Buruhani Nyenzi wakati akiwasilisha taarifa yake kwa Mhandisi Nditiye amesema mamlaka hiyo ni muhimu kwa ustawi na maendeleo ya taifa na wananchi kwa kuwa inatoa taarifa na huduma za hali ya hewa nchini ambayo imewezesha uokoaji wa maisha ya watu na mali zao.

Naye Kaimu Mkurugenzi Mkuu wa TMA, Dk. Hamza Kabelwa amemueleza Mhandisi Nditiye kuwa wahitaji wa taarifa za hali ya hewa kutoka kwa taasisi na wadau mbalimbali kwa ajili ya kutekeleza shughuli za kiuchumi na kijamii wamekuwa wengi na teknolojia ya utabiri wa hali ya hewa na utoaji wa taarifa zake umebadilika.