Mjumita yatoa mapendekezo manne kwa serikali

    Mkaa ni nishati muhimu kwa matumizi ya nyumbani, lakini katika maeneo mengi watayarishaji wa nishati hiyo hawazingii utunzaji wa mazingira kwa kuwa wanateketeza miti kwa kiwango kinachotisha.

Suleiman Kasei

MTANDAO wa Jamii wa Usimamizi wa Misitu Tanzania (Mjumita) umetoa mapendekezo manne kwa serikali ili kuhakikisha kuwa upotevu wa misitu nchini unadhibitiwa.

Mapendekezo hayo yametolewa na Ofisa Uraghibishaji wa Miradi Mjumita, Elida Fundi wakati akiwasilisha mada kwa wanahabari  mwishoni mwa wiki.

Fundi ametaja pendekezo la kwanza ni kuandaa sera ambazo zitatambua thamani ya huduma ya mifumo ikolojia na mazao ya misitu, hasa inayohusu uamuzi na mgawanyo wa ardhi.

Amesema pendekezo jingine ni kupitia sera ili kuweka uhusiano wa moja kwa moja wa biashara,  misitu na malengo ya kusimamia ardhi yenye misitu.

“Pia sera iunge mkono miradi inayotokana na misitu (mbao, mkaa) ambayo inanufaisha jamii ili kutoa motisha kwa usimamizi endelevu wa misitu ya asili; na kufikia mahitaji ya kiuchumi ya mazao ya misitu,” amesema.

Ofisa huyo ameongeza kuwa wakati umefika kupitisha kanuni ili mazao ya misitu ambayo yamevunwa bila kanuni za usimamizi endelevu yasihalalishwe kwenye vituo vya ukaguzi.

Aidha, Fundi amesema visababishi vikuu vya upotevu mkubwa wa misitu nchini ni mahitaji makubwa ya ardhi kwa ajili ya kilimo ambapo taarifa ya Naforma ya mwaka 2015 inasema takribani hekta 372,816 za misitu zinapotea kila mwaka na wakati huo huo taarifa ya Serikali ya Takwimu za msingi za Hewa Ukaa ya mwaka 2016 inaonesha kuwa hekta 469,000 za misitu inapotea kila mwaka.

Ofisa huyo amesema tafiti za hivi karibuni zinaonesha kuwa kati ya asilimia 70 hadi 80   ya matukio yaliyosababisha upotevu wa misitu nchini ni ufyekaji wa misitu kwa ajili ya upanuzi wa mashamba (kilimo).

Amesema sera zilizopo hazijaweza kutoa muongozo wa namna ya  kutatua kisababishi kikuu cha upotevu wa misitu nchini akitolea mfano sera ya misitu haina tamko linalozuia kubadilisha eneo la misitu kuwa shamba la kilimo, hususan maeneo muhimu ya kiikolojia kwa kuboresha uratibu na wizara ya kilimo, wizara ya ardhi.

Kwa upande wake Ofisa Mawasiliano wa Shirika la Kuhifadhi Misitu Asili Tanzania (TFCG), Bettie Luwuge amesema pamoja na kuwepo sera nzuri ni jukumu la serikali kutenga kutengeneza maeneo madogo ya usimamizi wa mkaa ndani ya misitu katika hifadhi za vijiji kwa ajili ya uzalishaji wa mkaa endelevu.

Amesema TFCG, Mjumita na Shirika la Kuendeleza Nishati Tanzania (TaTEDO) kwa  ufadhili wa Shirika la Maendeleo na Ushirikiano la Uswiss  (SDC) wamedhamiria kupigania utunzaji wa misitu na mazingira kupitia Mradi wa Kuleta Mageuzi katika Sekta ya Mkaa Tanzania (TTCS ), hivyo Serikali inapaswa kuunga mkono jitihada hizo.