Advertisement

Advertisement

Shop

Shop

Mixer

Mixer

Thursday, 15 February 2018

Ramaphosa aapishwa kuwa rais wa Afrika Kusini



Cyril Ramaphosa
MWENYEKITI wa chama tawala cha ANC, Cyril Ramaphosa amepishwa kuwa rais wa Afrika Kusini baada ya rais wa taifa hilo, Jacob Zuma kujiuzulu.
Rais huyo mpya alikuwa mtu wa pekee aliyeteuliwa jana Alhamis huku uteuzi huo ukiungwa mkono kwa shangwe kubwa bungeni.
Kabla ya kujiuzulu, Zuma alikuwa chini ya shinikizo kali kutoka kwa chama chake cha ANC kilichomtaka ajiuzulu la sivyo akabiliwe na kura ya kutokuwa na imani dhidi yake bungeni.
Katika taarifa ya runinga, alisema anajiuzulu mara moja lakini hakubaliani na uamuzi wa chama chake. Zuma anakabiliwa na madai kadhaa ya ufisadi lakini amekana kufanya makosa yoyote.
Alikuwa mwanachama wa jeshi la ANC wakati wa ubaguzi wa rangi, alipitia nyadhfa kadhaa za chama hicho hadi kuwa rais. Ameliongoza taifa hilo kwa muda mrefu baada ya ubaguzi wa rangi.
Lakini anaachilia madaraka akikabiliwa na kashfa kadhaa huku uchumi wa Afrika kusini ukiwa katika hali mbaya.
Siku ya Jumatano, maofisa wa polisi walivamia nyumba ya familia ya Gupta huko Johannesburg iliyokuwa na ushawishi mkubwa serikalini.
Familia hiyo imeshutumiwa kwa kutumia urafiki wao wa karibu na rais Zuma kujilimbikizia ushawishi mkubwa wa kisiasa. Hata hivyo, familia hiyo imekana hayo.
Nini hatma ya ANC?
Chama cha ANC kimeshinda kila uchaguzi Afrika kusini tangu kumalizika kwa utawala wa ubaguzi wa rangi mnamo 1994.
Kwa raia wengi wa Afrika kusini ndiyo chama kilichowaletea uhuru dhidi ya uovu na utawala uliogubikwa na ubaguzi wa rangi, na hili sio jambo linaloweza kusahaulika kwa urahisi.
Lakini umaarufu wake umekuwa ukififia na kwa mara ya kwanza kuna uwezekano wa kweli kwamba huenda chama hicho kikapoteza uongozi - hususan iwapo upinzani utaunga muungano.
ANC kilipata pigo la aibu katika uchaguzi wa serikali za kieneo mwaka 2016.
Licha ya kwamba kilipata kura zaidi dhidi ya vyama vingine, kilipoteza miji mikubwa ukiwemo mji mkuu kibiashara wa Johannesburg na Pretoria.
Wakati hapana shaka kwamba maisha ya raia wengi nchini yameimarika, wengi wanahisi yaliobadilika hayajatosha chini ya utawala wa chama hicho cha ANC.
Afrika kusini bado ni mojawapo wa mataifa yasio na usawa duniani na zaidi ya nusu ya idadi ya watu wanaoishi nchini humo wanaishi katika umaskini.
Tuhuma za rushwa katika serikali ya ANC zimeongeza chumvi kwa hisia iliopo kwamba kundi fulani la matajiri walio na uhusiano na wanasiasa wanafaidi huku raia wa kawaida wakiteseka.
Pia kuna hisia miongoni mwa Waafrika weusi nchini kwamba ngazi ya uongozi iliyoundwa chini ya utawala wa ubaguzi wa rangi bado ingaliko, hususan katika masuala ya ardhi na uchumi.
Ugavi mpya wa ardhi iliyonyakuliwa kutoka kwa mtu mweusi wakati wa utawala wa kibepari unachukua muda mrefu mno kutekelezwa.
Takriban asilimia 95 ya mali ghafi nchini ipo mikononi mwa asilimia kumi ya raia nchini.
Na Wazungu raia wa nchi hiyo bado wanalipwa mara tano zaidi ya wenzao weusi.
Chama cha ANC kimeahidi kushinikiza ugavi huo wa ardhi - kiasi cha kuahidi kuibadili katiba kuruhusu kuichukuwa ardhi iliyokuwa imenyakulia bila ya wamiliki wa sasa kulipwa fidia.
Na kimeidhinisha sera ya "mageuzi makali ya kiuchumi" - inayonuia kurudisha uongozi wa kiuchumi mikononi mwa idadi kubwa ya watu weusi nchini.
Lakini iwapo kinataka kuendelea kushikilia sifa na imani ya uwekezaji, chama hicho pia kinahitaji kuwashawishi wafanya biashara kwamba Afrika kusini haitofuata mkondo iliyoufuta Zimbabwe.
Kusawazisha maslahi ya wapiga kura dhidi ya wafanyabiashara na huenda uchumi ukaishia kuwa changamoto kubwa kwa chama cha ANC huku uchaguzi mkuu ukitarajiwa mwakani 2019.
BBC


No comments:

Post a Comment