Advertisement

Advertisement

.

.

Mixer

Mixer

Thursday, 29 March 2018

Miguna Miguna atimuliwa tena Kenya na kupelekwa Dubai


Miguna Miguna

MWANASIASA wa upinzani Kenya aliyeidhinisha kiapo cha kiongozi wa upinzani Raila Odinga kuwa 'Rais wa Wananchi' Januari Miguna Miguna ametimuliwa tena kutoka nchini humo.
Mwanasiasa huyo ametimuliwa huku mzozo kuhusu uraia wake ukiendelea. Miguna ameandika kwenye Facebook kwamba ameamka na kujikuta yuko Dubai na kwamba anahitaji matibabu.
Amesema anafahamu kwamba kuna mpango wa kumpeleka London lakini anataka kupanda ndege ya kurejea Nairobi. Mwanasiasa huyo amesema amesindikizwa na ofisa wa idara ya ujasusi.
Serikali imechukua hatua hiyo licha ya kuwepo kwa maagizo ya mahakama ya kuzuia kutimuliwa kwake na ya kuitaka serikali kufanikisha kurejea kwake nchini humo.
Mawakili wa Miguna wamethibitisha kwamba aliondolewa nchini humo kwa kutumia ndege ya shirika la Emirates iliyokuwa inaelekea Dubai.

Miguna alikuwa amezuiliwa uwanja wa ndege wa kimataifa wa Jomo Kenyatta (JKIA) tangu alipowasili Jumatatu adhuhuri.
Mwanasiasa huyo alikuwa anajaribu kurejea kutoka Canada ambako alikuwa amepelekwa baada ya kufurushwa kutoka Kenya kwa lazima mwezi Februari.
Jaji wa Mahakama Kuu George Odunga jana Jumatano alisema waziri wa usalama nchini humo, mkuu wa polisi na mkuu wa idara ya uhamiaji watakuwa wamekaidi maagizo ya mahakama iwapo wangekataa kumwachilia huru.
Alikuwa ametoa ilani kwa watatu hao kufika mahakamani baadaye Jumatano lakini baada yao kukosa kufika akawapata na hatia ya kukaidi agizo la mahakama.
Aliahidi kutoa adhabu dhidi yao leo Alhamisi asubuhi hii. Maofisa wa Kenya Febuari 6, mwaka huu walikuwa wamemfukuza kutoka nchini humo kutokana na mchango wake wakati wa kuapishwa kwa Odinga.
Walisema mwanasiasa huyo hana uraia wa Kenya lakini ana uraia wa Canada. Idara ya uhamiaji ya Kenya imekaririwa ikisema kuwa Miguna alipoteza uraia wa Kenya mwaka 1998 alipopewa uraia wa Canada wakati ilipokuwa ni kinyume cha sheria kuwa na uraia wa nchi mbili nchini Kenya.
Kuzuiliwa kwa Miguna kumejadiliwa pakubwa kwenye mitandao ya kijamii Kenya, baadhi wakiunga mkono hatua hiyo lakini wengine wakiwashutumu maofisa wa uwanja wa ndege na serikali.
Mmoja wa mawakili wa Miguna, Nelson Havi ni miongoni mwa waliokuwa wa kwanza kufichua kwamba Miguna alikuwa ametimuliwa tena nje ya nchi hiyo.
Usiku wa kuamkia Jumanne, kabla ya kusafirishwa kwa Miguna kwenda Dubai, mawakili James Orengo, Julie Soweto, Nelson Havi na Cliff Ombeta walikuwa wamefika uwanja wa ndege wa JKIA kujaribu kuwasilisha ilani ya mahakama ya kuwataka maofisa wa uhamiaji kutomsafirisha nje ya nchi Miguna.
Lakini taarifa za vyombo vya habari zinasema walishambuliwa na kupigwa na maofisa wa usalama katika uwanja huo.
Wanahabari hawajaruhusiwa pia kuingia tena uwanja huo. Baadhi walidaiwa kupigwa na kuumizwa na maofisa wa polisi wakati wa jaribio la kwanza la kumsafirisha Miguna kwenda Dubai usiku wa kuamkia Jumanne.
Jumanne Roselyn Aburili alikuwa ametoa agizo Miguna aachiliwe huru. Mawakili Orengo na Otiende Amollo walibandika agizo la mahakama katika milango ya afisi za uhamiaji JKIA na makao makuu ya polisi.
Baadaye Havi alijaribu kuwapasha habari maofisa hao kupitia mtandao wa Twitter hatua ambayo haikupokelewa vema na msemaji wa Wizara ya Mambo ya Ndani, Mwenda Njoka.
Njoka amesema hawawezi kupokea ilani ya mahakama kupitia mitandao ya kijamii. Miguna alikamatwa na polisi kwa mchango wake katika kuapishwa kwa Odinga kuwa "Rais wa Wananchi", hafla iliyofanyika uwanja wa Uhuru Park, Nairobi Januari 30.
Miguna, ambaye pia ni wakili, ndiye aliyetia saini hati ya kiapo ya Odinga.  Serikali ilikuwa imeeleza hatua hiyo ya kiongozi huyo wa upinzani kuwa uhaini wa hali ya juu.
Odinga anadai kwamba alimshinda Rais Uhuru Kenyatta katika uchaguzi mkuu wa Agosti 8 ambao matokeo yake yalifutiliwa mbali na Mahakama ya Juu kwa sababu ya kutokea kasoro nyingi.
Mahakama iliamuru uchaguzi mpya ufanyike lakini Odinga akasusia uchaguzi huo mnamo 26 Oktoba na kutangaza kwamba hakumtambua Kenyatta kama rais halali wa nchi hiyo. Baadaye aliongoza hafla ya kuapishwa kwake mnamo Januari 30.
Mapema mwezi huu, Odinga na Rais Uhuru Kenyatta walikutana katika mkutano ambao haukuwa umetarajiwa na wakahutubia wananchi moja kwa moja kupitia vyombo vya habari. Waliahidi maridhiano na pia wakaahidi kuwaunganisha tena Wakenya.
Jumatano Miguna alikuwa ameandika kwenye ukurasa wake wa Facebook Jumanne kwamba alikuwa anazuiliwa chooni uwanja wa ndege na kwamba alikuwa amezuiwa kuwaona mawakili wake na jamaa zake.
Chini ya Kifungu 17 cha Katiba ya Kenya, mtu aliyezaliwa nchini Kenya anaweza tu kuupoteza uraia wake iwapo itabainika kwamba aliupata uraia huo kwa njia ya ulaghai, au ibainike kwamba mtu huyo au wazazi wake walikuwa raia wa nchi nyingine, au ibainike kwamba mtu huyo alikuwa na umri wa zaidi ya miaka minane alipogunduliwa akiishi Kenya.
Serikali ya Kenya imekuwa ikisisitiza kwamba chini ya katiba ya zamani, Wakenya hawangekuwa na uraia wa nchi mbili.
Serikali inasema hatua ya Miguna ya kupata pasipoti ya Canada mwaka 1988 ina maana kwamba aliupoteza uraia wa Kenya wakati huo.
Ingawa Miguna aliwasilisha maombi na akapewa pasipoti ya Kenya mwaka 2009, serikali inasema pasipoti hiyo ya Kenya si halali kwa sababu hakufichua kwamba wakati huo alikuwa raia wa Canada pia.
Serikali imesema mwanasiasa huyo hakuwasilisha tena ombi la kuruhusiwa kuwa raia wa Kenya katiba ilipofanyiwa marekebisho mwaka 2010 na Wakenya wakakubaliwa kuwa na uraia wa nchi mbili.
Miguna amekuwa akisisitiza kwamba hakuwahi kuukana uraia wake wa Kenya na kamwe hawezi kufanya hivyo.
"Katiba iko wazi kabisa: hakuna mtu yeyote anayeweza au anayeweza kudai kuufuta uraia wa Mkenya aliyezaliwa nchini Kenya," amesema awali.
Presentational grey line
30 Januari: Miguna aidhinisha hati ya kiapo cha Raila Odinga kuwa 'Rais wa Wananchi'
2 Februari: Atangaza kwamba amekamatwa na polisi Nairobi
6 Februari: Afurushwa kutoka Kenya na kupelekwa Canada
16 Machi: Odinga awaambia wafuasi wake kwamba baada ya mapato yake na Kenyatta, Miguna anafaa kuruhusiwa kurejea Kenya bila masharti
26 Machi: Arejea Kenya lakini azuiliwa uwanja wa ndege wa JKIA. Baadaye usiku, anusurika jaribio la kumpeleka Dubai.
28 Machi: Miguna apelekwa Dubai kwa nguvu. Asema anafahamu mipango ya kumpeleka hadi London.
Presentational grey line
Miguna Miguna ni nani?
Miguna alizaliwa katika kijiji cha Magina, katika jimbo la Kisumu, magharibi mwa Kenya.
Amekuwa kiongozi wa kundi linaloitwa National Resistance Movement (NRM, Vuguvugu la Taifa la Kupinga Serikali), ambalo liliundwa na muungano wa upinzani wa National Super Alliance siku moja kabla ya kufanyika kwa uchaguzi wa marudio ambao Odinga alisusia mnamo 26 Oktoba mwaka jana.
"Utakuwa ni muungano wa ukombozi," alisema Odinga akitangaza kuundwa kwa vuguvugu hilo."Tumesema hatutaheshimu serikali dhalimu." Miguna baadaye alijitangaza kuwa Jenerali wa NRM.
Mnamo 30 Januari, siku ya kuapishwa kwa Odinga kuwa 'Rais wa Wananchi', muungano huo uliorodheshwa kuwa kundi haramu na waziri wa usalama Dk. Fred Matiang'i.
Hiyo haikuwa mara ya kwanza kwa Miguna kujipata akikabiliana na serikali na nguvu zake. Mwaka 1988, alikamatwa na serikali ya wakati huo ya Rais Daniel arap Moi. Miguna baadaye alitorokea Kenya ambapo alipata hifadhi kama mkimbizi wa kisiasa.
Alirejea nchini Kenya na akashiriki kampeni za uchaguzi za Odinga na chama chake cha Orange Democratic Movement (ODM) mwaka 2007.
Uchaguzi wa mwaka huo ulikumbwa na utata na baada ya serikali ya muungano kati ya Odinga na Rais Mwai Kibaki kuundwa, ambapo Odinga aliteuliwa kuwa Waziri Mkuu, Miguna alihudumu kama mmoja wa washauri wake kati ya 2009 na 2011
Wawili hao walizozana na Miguna akawa mmoja wa wakosoaji wakuu wa Odinga. Aliandika kitabu kwa jina Peeling Back the Mask ambapo alimkosoa sana Odinga na uongozi wake.
Mwaka 2013, alimuunga mkono Kenyatta katika uchaguzi wa urais mwaka huo. Lakini alibadilisha tena msimamo wake na kurejea upande wa Odinga mwaka 2017, mwaka ambao aliwania pia wadhifa wa Gavana wa Nairobi katika uchaguzi uliofanyika Agosti ingawa kama mgombea ambaye hakuwa na chama.
Januari 30 mwaka huu, ndiye aliyetia saini hati ya kiapo cha Odinga kuwa 'Rais wa Wananchi'. Odinga alipokutana na Kenyatta mnamo 9 Machi na wakaahidi kuunganisha Kenya, Miguna ni miongoni mwa waliomkosoa kiongozi huyo wa upinzani kwa hatua hiyo akisema huo ulikuwa sawa na usaliti.
BBC

No comments:

Post a Comment