Friday, 2 March 2018

Muasi wa zamani ageuka kuwa mlezi wa yatima


     Mariam Ndayisenga 
MWANAMKE mmoja nchini Burundi, Mariam Ndayisenga ambaye alikuwa ni miongoni mwa wanawake wa kwanza kujiunga na makundi ya waasi mwishoni mwa miaka ya 90, sasa analea watoto yatima.
Athari za vita kwa watoto ndiyo zilizomuhamasisha mwanamke huyu ambaye alikuwa mpiganaji wa zamani wa kundi la Waasi la CNDD/FDD kufanya kazi ya kuwalea yatima hao.
Mariam maarufu kama mama Zulu, alikutana na Mwandishi wa BBC, Ramadhani Kibuga katika makazi yake yaliopo Kinama kaskazini mwa jiji la Bujumbura.
Kituo chake kina watoto zaidi ya 70 wenye rika mbalimbali wakiwemo hata watoto wachanga.
Kituo hicho kinaonekana kuwa siyo cha kawaida kutokana na historia ya mmiliki wake kuwa mstaafu katika harakati za kijeshi.
Lakini ni nini kilichomsukuma kuanza kushughulika na kazi ya kulea yatima na kuacha shughuli za uasi.
“Mimi ni mama wa kwanza kabisa kuchukua silaha na kwenda kupigania nchi yangu lakini matokeo yake sikuwa ninayategemea kwa kuwa yalileta athari kubwa sana hasa kwa watoto,” amesema mama Zulu.
Katika vita alikutana na changamoto mbalimbali lakini kulea watoto hawa inampa furaha kwake na anasema hudumu za watoto kuanzia chakula, mavazi hata matibabu imekuwa sio jambo rahisi, lakini hajavunjika moyo na watu pia wanamsaidia kwa namna moja au nyingine.
Pamoja na kukutana na changamoto kadha wa kadha hata kwenye malezi ya watoto wahitaji, mama Zulu anasema katika maisha yake amezoea kupambana.
Maana hata wakati wa vita alipewa jina la mama Zulu kwa kuwa yeye ni mama shujaa na hata anadhani ushujaa wake unahitajika kuwalea watoto hao.
Burundi ni miongoni mwa nchi za Afrika zilizokumbwa na vita na kujikuta watoto wengi wako barabarani wakiwa ni omba omba na yatima. Hivyo, changamoto kubwa iliyobaki ni jinsi ya kuwatunza.


No comments:

Post a Comment