Advertisement

Advertisement

.

.

Mixer

Mixer

Friday, 23 March 2018

Mwanamke aliyedhalilishwa akijifungua kulipwa dola za Marekani 25,000


Josephine Majani 
MAHAKAMA Kuu nchini Kenya imeamuru mwanamke Josephine Majani aliyeteswa na kudhalilishwa wakati wa kujifungua hospitalini, alipwe fidia ya dola 25,000 za Marekani.
Mwanamke huyo alidhalilishwa miaka mitano iliyopita katika kisa ambacho kilizua malalamiko kutoka kwa raia na watetezi wa haki za kibinadamu baada ya kuangaziwa kwenye vyombo vya habari na mtandaoni.
Jaji wa mahakama kuu ya Bungoma, magharibi mwa Kenya, Abida Aroni amesema mamlaka ya afya nchini Kenya ilikiuka haki za msingi za Josephine Majani alipotengwa na kukosa kuhudumiwa wakati wa kujifungua katika hosipitali ya umma mwaka 2013.
Jaji huyo amesema haki ya msingi ya afya ya Majani, pamoja na heshima yake vilikiukwa kupitia yeye kuteswa kimwili na kutusiwa na wauguzi katika hospitali ya Bungoma.
Na kutokana na hilo, akaamuru alipwe fidia ya dola 25,000. Majani amefurahia uamuzi huo akisema hatimaye haki imetendeka.
Aliyoyapitia Josephine mikononi mwa wauguzi hao yalijulikana baada ya mtu kurekodi video kwenye simu yake na kuipakia kwenye mtandao wa kijamii.
Martin Onyango, wakili wa Josphine kutoka kituo cha Afrika kuhusu afya ya uzazi anasema kesi hiyo ni ushindi mkubwa kwa wanawake wanaotafuta huduma bora za afya ya uzazi katika hospitali za umma nchini Kenya.
Mwandishi wa BBC Victor Kenani aliyeko Nairobi anasema visa vinavyohusiana na unyanyasaji vimekuwa vikiripotiwa mara kwa mara katika hospitali za umma nchini Kenya.
Majani amesema fidia hiyo itamsaidia kumlea mtoto ambaye karibu ampoteze wakati wa kujifungua.
Kwa mujibu wa shirika la Umoja wa Mataifa kuhusu idadi ya watu, wanawake 495 kati ya laki moja walio wajawazito hufa kila mwaka kutokana na matatizo wakati wa kujifungua.
Shirika hilo linasema uamuzi wa leo umetoa mwongozo kuwa lazima wapewe huduma ya kujifungua ya viwango vya juu ili kuzuia vifo vya aina hiyo kutoka.

Chanzo: BBC

No comments:

Post a Comment