Serikali yaongeza kasi mapambano dhidi ya Ukimwi

Waziri wa Nchi Ofisi ya Waziri Mkuu Kazi Vijana Ajira na Wenye Ulemavu Jenista Mhagama akizungumza wakati wa ufunguzi wa warsha hiyo, kulia kwake ni naibu wake, Anton Mavunde.

SERIKALI imesema itaendeleza mapambano dhidi ya vita vya kupambana na ugonjwa wa Ukimwi kwa kuongeza kasi katika kuzuia maambukizi  mapya ikiwemo kutoa elimu kwa umma.

Akizungumza leo mjini Dodoma wakati wa warsha kwa wajumbe wa Kamati ya Kudumu ya Bunge inayoshugulikia Ukimwi na dawa za kulevya, Waziri wa Nchi Ofisi ya Waziri Mkuu Kazi Vijana Ajira na Wenye Ulemavu Jenista Mhagama amesema dhamira ya Serikali baada ya kuanzisha mfuko wa Udhamini wa Kudhibiti Ukimwi (ATF) ni kuhakikisha kuwa mfuko huo unajengewa uwezo ili kutimiza lengo la kuanzishwa kwake.

“Tayari mfuko umeweza kukusanya sh. bilioni 279 katika kipindi kilichopita na mwaka huu sh. bilioni 3 zimetengwa katika Bajeti na zitaingizwa katika mfuko huu ili uweze kutimiza majukumu yake kwa ufanishi na tumekuwa tukiwashirikisha wadau kuchangia na wamekuwa wakituunga mkono na tunaendelea kuwaomba wajitokeze zaidi kuchangia mfuko huu,” amesisitiza Mhagama.

Akifafanua Mhagama amesema tayari mapendekezo kuhusu kuwepo tozo maalum katika kodi yameshawasilishwa katika kamati husika kwa hatua zaidi dhamira ikiwa ni kuujengea mfuko huo uwezo wa kuwa na fedha za kutosha katika kufanikisha vita dhidi ya Ukimwi hapa nchini.

Mkakati mwingine ni ujenzi wa kituo maalum katika eneo la Mererani  mkoani Manyara kitakachosaidia katika mapambano dhidi ya Ukimwi kwa kuwa eneo hilo ni moja ya maeneo yenye mwingiliano mkubwa wa watu kutokana na shughuli za uchimbaji madini.

Hatua nyingine ni kufanya kazi kwa kushirikiana kati ya Tacaids  na Mamlaka ya Kupambana na Dawa za Kulevya ili kuwafikia waathirika wa dawa za kulevya ambao ni moja ya makundi yanayoathika na ugonjwa wa Ukimwi kwa mujibu wa tafiti mbalimbali.

Kwa Upande wake Mwenyekiti wa Kamati hiyo, Osca Mukasa amesema kutengwa fedha katika bajeti ya 2018/19 zitakazopelekwa katika mfuko wa kudhibi Ukimwi ni ishara nzuri kuwa serikali imeweka mkazo katika mapambano dhidi ya janga hilo.

Naye Mkurugenzi Mtendaji wa Tacaids, Dk. Leonard  Maboko amesema Tume hiyo iko katika hatua za mwisho za kukamilisha mkakati wa Nne unaolenga kuongeza  nguvu ili kufikiwa kwa malengo ya mkakati huo.

Akifafanua Dk. Maboko amesema tume hiyo imeandaa kampeni maalum za kuhamasisha wananchi kupima ili kujijua kama wameambikizwa virusi vya Ukimwi au laa hali itakayowasaidia kuchukua hatua stahiki na kwa wakati hivyo kuzuia maambukizi mapya hasa kwa vijana.

“Hapa nchini kwa mwaka kuna maambukizi mapya 81,000 hivyo ni vema tukaungana katika mapambano dhidi ya ugonjwa huu kwa kuwa uwezo wa kuzuia maambuki mapya tunao”. amesisitiza Dk. Maboko.

Warsha kwa wajumbe wa Kamati ya Kudumu ya Bunge ya Ukimwi na Madawa ya Kulevya imefanyika mjini Dodoma leo  ikiwashirikisha wajumbe wote wa kamati hiyo, Aidha mfuko wa Udhamini wa Kudhibiti Ukimwi (ATF) unalenga kuongeza rasilimali fedha kutoka asilimia 7 (2015) hadi asilimia 30  (2018).