Friday, 23 March 2018

Trump kuiongezea China ushuru wa forodha



Donald Trump
RAIS wa Marekani, Donald Trump ametangaza mpango wa ongezeko la ushuru wa forodha kwa bidhaa za China.
Hali hiyo inatarajiwa kuongeza vita vikali vya kibiashara ambavyo huenda vikawa na madhara kwa mataifa hayo mawili yenye nguvu kubwa kiuchumi duniani.
Hata hivyo, Trump ametia saini hati ya maelekezo kwa maofisa juu ya namna ya kushughulikia suala la ushuru kwa bidhaa za mabilioni ya dola zinazoingizwa kutoka nchini China.
Trump amesema awali aliiona China kama rafiki, lakini amebaini kuwa vikwazo vinahitajika baada ya kugundua kuwa taifa hilo linaonekana kutaka kujinufaisha kijanja katika uendeshaji biashara ambao umekuwa ukiingizia Marekani hasara ya mabilion ya dola kila mwaka.
Amesisitiza kuwa China ni moja kati ya mataifa anayokusudia kuingia katika majadiliano ya kibiashara.
"Ndiyo tumeanza majadiliano na Umoja wa Ulaya, kwa sababu wametuwekea vikwazo, kuna mazingira ambayo yanawaruhusu kufanya biashara na sisi, lakini sisi hatuwezi kufanya biashara na wao.Wana vikwazo vikubwa dhidi yetu,wana ushuru wa forodha mkubwa sisi hatuna,siyo haki.
“Nao Nafta wamekuwa wabaya kwetu, lakini tutajitahidi kurekebishana ama kufanya kitu cha ziada. Mpango wa kibiashara na Korea Kusini ni wa upande mmoja, unatakiwa kufanyiwa mabadiliko.
"Kwa hiyo kuna mambo mengi yanayotokea, lakini kwa suala la China tutatumia kifungu 301 ambacho kitahusisha dola bilioni  60 ambazo ni sehemu tu ya hiki tunachokizungumza,”amesema Trump.
Hatua hii ya rais Trump dhidi ya China imekuja baada ya uchunguzi wa mwezi Agosti mwaka jana kuhusu suala la forodha ambao uliagizwa kufanyika na Trump mwenyewe.
China kwa upande wake imeonya na kuongeza kuwa iko tayari kujibu mashambulizi ya kibiashara dhidi ya Marekani na imeituhumu Marekani kwa kukiuka sheria za kimataifa za kibiashara.

No comments:

Post a Comment