Wafungwa magereza nyanda za juu Kusini kunufaika na mafunzo ya ujasiriamali

 Kamishna Jenerali wa Jeshi la Magereza, Dk. Juma Malewa akipongezana na Meneja Mkazi wa Asasi ya Technoserve, Monsiapile Kajimbwa mara baada ya kubadilishana mkataba wa makubaliano baina ya asasi hiyo katika mradi wa mafunzo ya ujasiriamali kwa wafungwa waliopo katika magereza mbalimbali.

Peter Simon

JESHI la Magereza limetiliana saini na Asasi ya Technoserve kuendesha mafunzo ya ujasiriamali kwa wafungwa vijana wenye umri wa kati ya miaka 18 hadi 30 waliopo magerezani kwenye mikoa ya Mbeya, Songwe, Iringa, Njombe, Ruvuma, Katavi na Rukwa.

Hafla ya kutiliana saini makubaliano hayo imefanyika katika ofisi za makao makuu ya jeshi hilo Dar es Salaam ambapo Technoserve iliwakilishwa na ofisa wake, Monsiapile Kajimbwa.

Akizungumza baada ya kutiliana saini makubaliano hayo, Kamishna Jenerali wa Magereza, Dk. Juma Malewa amesema mafunzo hayo yatawapa uwezo wa kubaini na kutumia fursa mbalimbali za kiuchumi  wafungwa hao ikiwemo kubuni na kuandaa mipango ya biashara.

“Mafunzo haya yatawanufaisha sana wafungwa waliopo magerezani katika mikoa hiyo kwani yatawajengea uwezo wa kujitambua pamoja na kujipatia vipato halali badala ya kutenda uhalifu katika jamii,” amesema Jenerali Malewa.

Ameongeza kuwa mafunzo hayo yatafanyika katika Chuo cha Ufundi cha Magereza Ruanda kilichopo mkoa wa Mbeya ambapo wafungwa watajifunza nadharia na vitendo katika dhana nzima ya ujasiriamali ikiwemo stadi za utengenezaji sabuni, ushonaji, useremala, ufumaji sanjari na uandaaji wa mipango ya kibiashara.

Meneja Mkazi wa Technoserve, Monsiapile Kajimbwa amesema hatua ya kutiliana saini makubalino hayo ni kuimarisha ushirikiano kati ya asasi yake na Jeshi la Magereza katika kutoa mafunzo kwa wafungwa ili waweze kupata ujuzi kupitia program hiyo.