Advertisement

Advertisement

.

.

Mixer

Mixer

Tuesday, 3 April 2018

Majaliwa aomba viongozi wa dini waendelee kulinda amani



Peter Simon, Dodoma

WAZIRI Mkuu, Kassim Majaliwa amewaomba viongozi wa dini wahakikishe wanaipigania na kuilinda amani kwa kila hali ikiwa ni pamoja na kupambana na viashiria vya uvunjifu wa amani.

Waziri Mkuu ametoa kauli hiyo mwishoni mwa wiki kwenye Mkutano Mkuu wa Baraza la Waislamu Tanzania (Bakwata), uliofanyika katika ukumbi wa Pius Msekwa Dodoma, ambapo amesisitiza kuwa ni muhimu wasaidizi wa Mufti wakasimamia suala hilo.

“Dini ni taasisi muhimu sana kwa maisha yetu ya kila siku ndio maana Serikali inaheshimu na kuzitambua dini zote kutokana na mchango wake mkubwa katika amani ya nchi yetu. Niwaombe viongozi wangu popote mlipo muilinde amani yetu”

Waziri Mkuu amesema amani ni miongoni mwa neema kubwa kwa binadamu ndio maana wote wanamtambua Mwenyezi Mungu, hivyo wasiruhusu mtu au kikundi chochote kujaribu kuchafua au kuharibu amani iliyopo nchini.

Katika hatua nyingine, Waziri Mkuu amewasisitiza viongozi wa Bakwata kuhakikisha kuwa chombo hicho kinaendelea kuwaunganisha waislamu bila kujali makabila yao, rangi zao au madhehebu yao.

Waziri Mkuu amesema Mufti wa Tanzania Sheikh Aboubakar bin Zubeiry ambaye ndiye kiongozi wa Waislamu nchini mara zote amekuwa akisisitiza jambo hilo na kuwataka waislamu popote walipo watambue kuwa hicho ni chombo chao.

“Ni muhimu sana kwa ninyi wasaidizi wa Mufti mlio kusanyika hapa muhakikishe mnalisimamia hili katika maeneo yenu. Katika hili napenda kuwahakikishia kuwa Serikali yenu iko pamoja nayi Mufti endelea kutekeleza nia hiyo njema.”

Amesema ahadi ya Rais Dk. Magufuli ni kuwa Serikali anayoiongoza ipo tayari kusikiliza maoni, ushauri na  mapendekezo yoyote kutoka kwa viongozi wa dini . ‘Milango iko wazi saa zote ‘

Ameongeza kuwa yeye si mtaalamu sana kama walivyo Masheikh hao lakini anakumbuka maneno ya Mwenyezi Mungu ndani ya Qur’ani sura Al Imran aya ya 103 yanayosema “ Shikamaneni na kamba ya Mwenyezi Mungu nyote na wala msifarakane”

Mkutano huo umehudhuriwa na  Sheikh Mkuu na Mufti wa Tanzania Sheikh Zubeir, Waziri wa Nchi Ofisi ya Rais-Tamisemi, Seleman Jaffo,  wajumbe wa Baraza la Ulamaa, Masheikh na viongozi wa Bakwata wa mikoa na wilaya zote Tanzania.

Waziri Mkuu, Kassim Majaliwa akisalimiana na Mufti Mkuu wa Tanzania, Abubakary Zubeiry wakati alipowasili kwenye ukumbi wa Msekwa mjini Dodoma kufungua mkutano wa Baraza Kuu la Waislamu Tanzania (Bakwata)

No comments:

Post a Comment