Advertisement

Advertisement

.

.

Mixer

Mixer

Tuesday, 10 April 2018

Trump aahidi kutumia nguvu kujibu shambulio la Syria


Donald Trump 
RAIS wa Marekani, Donald Trump ameahidi " kutumia nguvu " kujibu madai ya shambulio la kemikali nchini Syria, huku mataifa ya magharibi yakitafakari hatua yatakayoichukulia.
"Tuna njia nyingi za kijeshi,"aliwambia waandishi wa habari. Ameongeza hatua ya kujibu shambulio hilo itaamuliwa katika kipindi cha "muda mfupi".
Trump amesema Marekani inapata ''msaada mzuri" kuhusu nani aliyehusika na shambulio la Douma Jumamosi.
Duru za kitabibu zinasema makumi kadhaa ya watu waliuawa katika shambulio hilo, lakini idadi kamili haijathibitishwa.
Trump pia amejadili tukio hilo la rais wa Ufaransa Emmanuel Macron jana Jumatatu jioni na viongozi wote walielezea utashi wao wa "kujibu kikamilifu".
Waziri Mkuu wa Uingereza, Theresa May amesema "analaani vikali" kitendo cha "ukatili" kinachodaiwa kuwa ni shambulio la kemikali na akatoa mwito kwa wanaomuunga mkono rais Bashar al-Assad kuwajibishwa.
Kauli za viongozi wa kimagharibi za kulaani shambulio hilo zimefuatia kikao cha malumbano katika Baraza la Usalama la Umoja wa Mataifa ambapo Marekani na Urusi walitupiana maneno makali kuhusiana na tukio la Douma.
Mwakilishi wa Urusi kwenye baraza hilo, Vassily Nebenzia amesema shambulio hilo linadaiwa lilipangwa na akaonya kwamba hatua za kijeshi za Marekani zinazolenga kujibu tukio hilo "zitakuwa na athari mbaya".
Mjumbe wa Marekani Nikki Haley amesema wanaounga mkono jeshi la Syrian - wana "damu ya watoto wa Syria " mikononi mwao na akambandika jina rais Assad kama "zimwi ".
Haley ametoa mwito wa kupigwa kura kuhusu muswada wa maazimio ya kubuniwa tume ya uchunguzi ya matumizi ya silaha za kemikali nchini Syria siku ya Jumanne.
Lakini Urusi inasema haiwezi kuunga mkono pendekezo hilo kwasababu lina "vipengele visivyokubalika''.
Shirika la matibabu la Marekani na Syria linasema watu zaidi ya 500 waliletwa kwenye kituo cha matibabu katika mji wa Douma, uliopo jimbo la mashariki la Ghouta, karibu na mji mkuu Damascus, wakiwa na dalili "zinazoonesha kuwa walishambuliwa na kemikali".
Shirika hilo linasema dalili walizokuwa nazo ni pamoja na ugumu wa kupumua, ngozi ya samawati , kutokwa na povu mdomoni , kuungua kwa mboni na "walikuwa na harufu kama ya kemikali ya chlorine".
Idadi kamili ya vifo ya na ni nini hasa kilichotokea haviwezi kuthibitishwa kwasababu eneo hilo halina mawasiliano.
Makadirio ya idadi ya watu waliouawa katika shambulio hilo linaloshukiwa kuwa la kemikali ni kuanzia watu 42 hadi zaidi 60, lakini makundi ya kitabibu yanasema idadi hiyo inaweza kuongezeka baada ya wahudumu wa uokoaji kuweza kufika kwenye sehemu za chini za majengo ambako mamia ya familia walikuwa wamekimbilia kuepuka mashambulio ya mabomu.
Mwakilishi wa Ufaransa katika Baraza la Usalama la Umoja wa Mataifa amesema gesi ya sumu ilitumiwa kwa makusudi kwasababu inaweza kusambaa hadi sehemu za chini za majengo.
Marekani, Ufaransa na Uingereza wameongoza kampeni ya kimataifa ya kulaani shambulio hilo linalodaiwa kuwa la kemikali, huku serikali ya Syria na waungaji mkono wao Urusi wakikana kuwajibika kwao kokote na tukio hilo.

No comments:

Post a Comment